تاصلت بيا واحد السيدة من قناة الحرة ، قالت لي واش يمكن تكون حاضر معانا فواحد البرنامج ، غادي إكون فيه نقاش علا الحريات بالمغرب ، غيدوز مباشرة بلا مونطاج بلا حذف ، عبر كيف ما بغيتي بلا قطيع بلا رقابة علا لهضرة لي غادي نقول ، أقالت لي بلي غادي إكون فالطرف الآخر " كبيرهم " ، ماشي مهم نمشي نوصل رسالة ديالي أنديرو بحالا مكاينش ، حينت عارفو مغديش إجي باش إناقش الموضوع المطروح فالبرنامج أغادي إجي غير باش يتبلطج ، ملي بدا البرنامج أهو كحاول إشخصن النقاش ، ألموضوع كان كبير علا هاد شي ، حاولت نتفداه أنوصل داك شي لي كنت جاي علا قبلو ، واخا ضيع ليا بزااف ديال الوقت لأنه ماكيحترمش كلمة الآخر كيهدر معايا في نفس الوقت وكيقاطعني و يقاطع المسير، واحد اللحضة برزطني بزاف قلت لو حتا نسالي ليك أغادي نجاوبك
ساليت ليك دابا أغادي نجاوبك ، رغم أنه نتا مكتستحقش نضيع عليك تا دقيقة من وقتي ، أكما قال الشافعي:
" إذا نطق السفيه فلا تجبه .. فخير من إجابته السكوت
فإن كلمته فرجت عنه .. وإن خليته كمدا يموت "
غادي نجاوبك لسببين ، السبب الأول كلك تقابي أ تناقضات والسبب الثاني حينت بساليتي ...
ماعلينا يا " كبيرهم " غادي نعطيك نقطة بنقطة باش تدي ما تعاود أمتبقاش دير لبسالة :
١ : كتوزن العقل ديال الإنسان بالسن ديالو ، وشحال من واحد فالعالم صغير فالسن ولكن دار أفعال لي مادارهومش كبار السن ، وأكبر مثال خونا mark zuckerberg لي داير معانا المزيان بالفايسبوك ، فاش قادو ماقالوش ليه الناس نتا صغير مخصكش دير هاد شي بالعكس شجعوه ، أكمل طريقو أولات عندو شركة من أكبر الشركات فالعالم الإلكتروني أهو فعمرو شي ثلاثة وعشرين عام ...، والعقل ديالك محدود ، وكما يقول المثل الصيني ، العقول ثلات ، عقول تناقش الأفكار ، وعقول تناقش الأحداث بحال الجريدة ديالكم ، وعقول تناقش الأشخاص بحال سعادتكم ...
٢ : كتخلط بين الوعي والثقافة ، أكتقول بلي لي ماقاريش ما يمكنش إدير شي حاجة تنفع هاد العالم ولكن راك غالط يا " كبيرهم " ، حينت التاريخ دازو فيه بزاف ديال الناس لي كانو فاشلين فقرايتهم ولكن دارو شي حوايج لي كتسنافد منهم الإنسانية جمعاء ، كتبو كتوبة وختارعو لينا حتا ضو ،منهم " آينشتاين ، بيكاسو ، بسمارك ، ولتر سكوت ، صمويل جونسون ، حنا مينا ،محمد شكري " والقائمة طويلة ، والدراسات العليا تقدر بعض المرات تكون ضد الإنسان ، وتردو بحال الروبو ، كيف كيقول نيتشه رحمة الله عليه :
- ما مهمة التعليم العالي ؟
- تحويل الإنسان إلى آلة -
أهاد شي كنطبق عليك ، حينت نتا وليتي آلة ، كتحرك بتيليكوموند ، ومن الأحسن بلاما ندخلو فالتفاصيل ...
٣ : إلا رجعنا للفيديو ديال برنامج عين على الديمقراطية ، واحد الوقيتة كتقول بلي المغرب سبق (الربيع العربي) أعندنا الحرية والأرنبات أداك شي ، واش كتفلا علا لوقت ولا مكتشوفش لإحصائيات والرتب ديالنا فالعالم المشرفة ، غير مؤخرا كلاساتنا مؤسسة فريدوم هاوس فالرتبة 147 من ضمن 197 دولة ، و في ما يخض التقدم ديال البلاد كنذكرك اننا احتلينا المرتبة 117 عالميا في عام 1995 و المرتبة 125 في عام 1998 و المرتبة 129 في عام2014 غادين وكنرجعو للوراء. بلاما نستف ليك الرتب ديالنا فجميع المجالات ، غير طابي فغوغول أي رتبة أغادي تشوف هداك شي كفرح ، يا بختك مع مين أتكلم أنا ...
٤ : علاش مستحيل تكون صديقي ؟
ديما فالمقالات ديالك كتهين شرفاء هاد الوطن ، لي ضحاو بكلشي علا قبل إشوفو هاد لبلاد زوينة ، فيها العدل والقضاء مستقل كيرجع ليك حقك أكيطبق القانون علا كلشي ، بحال داك لي كنقي زبلنا فالزنقة بحال أعلى سلطة فالبلاد ، ضحاو باش إكون كلشي يقدر إداوا ويكون عندنا تعليم مككلخش ولاد الشعب ، ضحاو أضحاو أمزال كضحيو ، أنتا بلا حشمة بلا حية كتهينهم ، ولكن ماشي ذنبك أكبيرهم ، وحتا أنا تقريبا كتبتي عليا ما يفوق ٧ المقالات ، وكان من بين هاد المقالات ، مقال كتهين فيه " عوكاشة فاميلي " كاملة بطريقة مباشرة ، قريت المقال ولكن مجوبتكش ، قلت خليه لهلا يهديه علا راسو ، أفهاد المقال إلا بقيت عاقل قلتي بلي خاصنا كاملين إدخلونا للحبس زيادة علا السب والإهانة ، ، يعني كيفاش غادي يمكن تكون صديقي ونتا كتكرهني حتا لهاد الدرجة ، بحالا فايت عندي معاك شي حساب ، غير نتا و راسك مشكل ليك عقدة والله ما عرفت علاش ، واش عندك معايا شي حساب قديم كتصفيه ... الله أعلم !!!! ، خاصك تشكرني بزااف حينت حققت ليك لأمنية ديالك أجاوبتك ، وبلاما تسنا أنني نسميك فشي مورسو د راب والله ما نديرها (أسمح ليا أراسي خليتك دير راسك فواحد ماشي من نحاسك ) .
٥ و آخيرا : الصداقة شي حاجة زوينة ، أعندي بزاااف ديال الأصدقاء فالعالم لي نقدر نعطيهم دمي ، أرسطو كيقول بلي كاين ثلاثة الأنواع ديال الصداقة : صداقة المنفعة وصداقة اللذة و صداقة الفضيلة ، هاد الأخيرة هي لي كنفضل ، كنغلط حتا أنا ولكن ديما كنحاول منغلطش مع أصدقائي عن عمد ، عندي أصدقائي بزاااف فعالم الصحافة لي كشرفني أنهم إكونو أصداقي ، بوبكر لي ضحى أكال دق بسباب التضحيات ديالو أمزال كياكل الدق ، علي لي مزال متابع بتهم تقيلة لإسكاته لحقاش ديما مبرزطهم بالمقالات لي كان كتحدى فيها داك شي لي كتعتابرو نتا مقدس أخطوط حمراء ، خلاصة وعصير القول : نتا صحفي بعقلية شرطي المرور ، تتقن دور البريئ وجريئ أكثر من سينا ... وسينا أشرف منك ....
لذلك يا كبيرهم ......
أنت لست صديقي ...